కొకైన్ తయారి లో ఆ మూడు దేశాల పాత్ర

కొకైన్ తయారి లో ఆ మూడు దేశాల పాత్ర

------------------------------------------------------

 ఈ మధ్య కాలం లో ఓ మహిళా వైద్యురాలు 53 గ్రాముల కొకైన్ తో పట్టుబడడం తో అసలు ఈ మత్తు పదార్థానికి ఇంతటి అధికారం ఏమిటి మానవ దేహం మీద, అనే అనుమానం రాకమానదు. కొకైన్ డోస్ 30 నుంచి 70 మిల్లీగ్రాములు తీసుకుంటే చాలు, రెండు లేదా మూడు నిమిషాల్లో మెదడు లో స్వైర కల్పనలు మొదలయి ఎక్కడికో వెళ్ళిపోతుంది. పోను పోను అలవాటు ముదిరితే 1 గ్రాము వరకు ఒకే దెబ్బ లో తీసుకోగలరు. అంతకి మించి 2 గ్రాముల వరకు ఒకేసారి తీసుకుంటే చావు బ్రతుకుల మధ్య ఉన్నట్లే అంటున్నారు శాస్త్రవేత్తలు.

ప్రతిరోజు 5 గ్రాముల దాకా విడతలు విడతలుగా తీసుకునే వారి శరీరం లో అనేక అవయవాలు దెబ్బతింటాయి.కిడ్నీలు, ప్రేవులు, ఊపిరితిత్తులు దెబ్బతింటాయి. కేంద్ర నాడీమండల వ్యవస్థ పాడయి మానసిక భ్రాంతులు కలగడం,వణుకు రావడం,ఊపిరి పీల్చడం లో ఇబ్బందులు ఇలా ఎన్నో రుగ్మతలు వస్తాయి. సాధారణం గా కొకైన్ ని ముక్కు తో పీల్చడం ద్వారా,ఇంజెక్ట్ చేసుకోవడం ద్వారా, సిగరెట్లలో పెట్టి తీసుకుంటారు. తీసుకున్నతర్వాత ఒక్కొక్కరికి రకరకాల తేడాలతో భ్రాంతులు కలుగుతాయి. ఆ హాయి కోసమే ముందు అలవాటయి అది ముదిరిన తర్వాత వారి జీవితం ఎలా ముగుస్తుందో తెలియని దశ కి చేరుకుంటారు.

కోకా ఆకులు నుంచి కొకైన్ ని తయారు చేస్తారు. కొలంబియా, పెరూ, బొలీవియా వంటి దేశాల్లో ఈ కోకా పంట విరివిగా పండుతుంది.మొట్టమొదట స్థానికులు అజీర్ణానికి, చురుకు గా ఉండటానికి ఈ ఆకుల్ని మందుగా నమిలేవారు.అయితే జర్మన్ రసాయన శాస్త్రవేత్త అల్బర్ట్ నీమన్ ఒకసారి ఈ ఆకుల్ని నమలగా విచిత్ర అనుభూతి కలిగింది. దాంతో ఆయన కోకా ఆకుల్లోనుంచి రసాన్ని పిండి , దానికి కొన్ని రసాయనాలు కలిపి కొకైన్ అనే తెల్లటి పదార్థాన్ని 1860 లో తయారు చేశాడు.ఆ విధం గా ఇపుడు మనం చూసే కొకైన్ పుట్టింది. ఫ్రెంచ్ రసాయన శాస్రవేత్త ఏంజిలో మరియాని దీనితో ఓ టానిక్ ని తయారు చేశాడు.

మొదట్లో కోకా కోల పానీయం లో కూడా వాడేసిన కోకా ఆకుల్ని వినియోగించేవారు.1920 తర్వాత నుంచి దీన్ని నిలిపివేశారు.ఒక కిలోగ్రాం కొకైన్ తయారు చేయాలంటే వెయ్యి కిలోగ్రాముల కోకా ఆకులు కావాలి. దానికి మరిన్ని రసాయనాలు కలుపుతారు.ప్రపంచం లోని మొత్తం కొకైన్ లో 70 శాతం పైగా ఒక్క కొలంబియా లోనే తయారవుతుంది. ఆ తర్వాత స్థానం పెరూ, బొలీవియా దేశాలది. కేవలం ఈ కొకైన్ వల్లనే కొలంబియా దేశం వారానికి 400 మిలియన్ డాలర్లు ఆర్జిస్తుంది. దక్షిణ అమెరికా ఖండం లోని ఆ మూడు దేశాలు కొకైన్ ని బయటకి పంపిన తర్వాత ప్రపంచ మార్కెట్ లో దాని విలువ ఇబ్బడి ముబ్బడిగా పెరిగిపోతుంది.           

మత్తు పదార్థాలు అన్నిటిలోనూ దీనికి గల ప్రాముఖ్యత వల్ల షాంపేన్ ఆఫ్ డ్రగ్స్ అని ముద్దుగాపిలుస్తారు. 1970 వరకు కేవలం మందుల తయారీ లోనే ఎక్కువగా వాడేవారు. అమెరికా లో కొకైన్ కి లభించిన పాపులారిటీ వల్ల , ముఖ్యంగా పాప్ సంగీతకారులు, ప్రముఖులు తీసుకోవడం వల్ల మీడియా లో హైప్ వచ్చి దేశదేశాలు విస్తరించింది. ఒక దశలో అంటే 1982 ప్రాంతం లో కోటి నలభై లక్షల మంది అమెరికా లోని ప్రజలు దీనికి బానిసలయ్యారు. ప్రస్తుతం ఈ కొకైన్ డ్రగ్ మాఫియా ప్రపంచం లోని చాలా దేశాలకి విస్తరించింది. వివిధ మత్తు పదార్థాల సేవనం లో ఉత్తర్ ప్రదేశ్, బీహార్,కేరళ, వెస్ట్ బెంగాల్, మహారాష్ట్ర వరుసగా ముందంజ లో ఉన్నాయి. 

----- మూర్తి కెవివిఎస్